काठमाडौं- क्रियाशील सदस्य विवाद टुंग्याउन आज नेपाली कांग्रेस कार्यदलको बैठक बस्दैछ ।
क्रियाशील सदस्यता विवाद समाधान गर्न कृष्णप्रसाद सिटौला, डा. मिनेन्द्र रिजाल र रमेश लेखक सम्मिलित समितिको बैठक आज दिउँसो १ बजे बस्ने र साँझ ५ बजे प्रधानमन्त्रीसमेत रहेका पार्टी सभापति शेरबहादुर देउवालाई प्रतिवेदन बुझाउने तयारी भएको छ ।
विशेष गरी सप्तरी, रौतहट र बाराका क्रियाशील सदस्यता सम्बन्धमा सहमति जुटाउन बाँकी छ । दिउँसो बस्ने बैठकमा सहमति जुटाउने प्रयास गर्ने र सहमति नजुटेमा आफ्नो रायसहितको प्रतिवेदन सभापति देउवालाई बुझाउने तयारी कार्यदलले गरेको छ ।
कार्यदलले आइतबार नै सभापति देउवालाई प्रतिवेदन बुझाउने तयारी गरेको थियो । तर, केही विषयमा छलफल गर्नुपर्ने भएकाले आज बुझाउन लागेको समिति सदस्य लेखकले जानकारी दिए ।
यता कार्यदलको बैठक बस्ने तयारी भइरहँदा कांग्रेसका वरिष्ठ नेता रामचन्द्र पौडेलले आफ्नो समूहको बैठक आयोजना गरेका छन् ।
