काठमाडौँ- स्थानीय तह निर्वाचनको मौन अवधि आज मध्यरातिदेखि सुरु हुँदैछ। निर्वाचनमा उम्मेदवार बनेकाहरुले आज राति १२ बजेसम्म मात्रै चुनावको प्रचारप्रसार गर्न पाउने छन्।
३० वैशाखमा देशभरका सात सय ५३ स्थानीय तहमा एकसाथ हुने निर्वाचनका लागि मंगलबार राति १२ बजेदेखि मौन अवधि सुरु हुने निर्वाचन आयोगले जनाएको छ। मतदान नसकिएसम्म मौन अवधि कायम रहने छ।
मौन अवधि सुरु हुनै लाग्दा निर्वाचन आयोगले सामाजिक सञ्जालबाट निर्वाचन आचारसंहिता विपरीतका पोस्ट हटाउन र नयाँ पोस्ट नगर्न निर्देशन दिएको छ।
आयोगका प्रवक्ता शालिग्राम पौडेललेका अनुसार यसका लागि आवश्यक निर्देशन दिन र नियमन गर्न आयोगले नेपाल दूरसञ्चार प्राधिकरणलाई निर्देशन दिइसकेको छ।
मौन अवधि सुरु हुनुभन्दा अगाडि मतदान केन्द्रको ३०० मिटर वरिपरि राखिएका आ–आफ्ना निर्वाचन चिह्न तथा प्रचारप्रसार सामग्री हटाउन निर्वाचन आयोगले आग्रह गरेको छ।
मौन अवधिमा राजनीतिक दल, उम्मेदवार र मतदाताहरुले सभा जुलुस गर्न, मत माग्न, पक्ष विपक्षमा प्रचारप्रसार गर्न पाउने छैनन्।
दल तथा उम्मेदवारका प्रचारप्रसार मतदानको अन्तिम समयमा आएर कुनै द्वन्द्वमा परिणत नहोस् वा निर्वाचनको मुखमा प्रचार प्रसारमा विकृति नबढोस् भनेर मौन अवधि राख्ने गरिएको आयोगका पूर्व प्रमुख आयुक्त नीलकण्ठ उप्रेती बताउँछन् ।
मौन अवधिमा सञ्चार माध्यम र सामाजिक सञ्जाल मार्फत् पनि उम्मेदवारको पक्षविपक्षमा प्रचारप्रसार गर्न पाइँदैन। स्थानीय तह निर्वाचन आचारसंहिता, २०७३ अनुसार एसएमएस, फेसबुक, भाइबर जस्ता विद्युतीय माध्यमद्वारा प्रयोग गरिने सामाजिक सञ्जालमार्फत मत माग्न र निर्वाचन प्रचार प्रसार गर्न हुँदैन।
त्यसैगरी उम्मेदवार वा राजनीतिक दलको निर्वाचन चिह्न अङ्कित पहिरन, टोपी, स्टिकर, लोगो, झोला, ट्याटुजस्ता साङ्केतिक सामग्रीको प्रयोग गर्न, बिक्री गर्न वा प्रदर्शन गर्न वा गराउन पनि नपाइने निर्वाचन आयोगले जनाएको छ।
निर्वाचन सामग्री हटाए/नहटाएको तथा नयाँ प्रचार सामग्री राखे/नराखेको सम्बन्धमा निगरानी गर्ने जिम्मेवारी प्रहरी र सेनाको साइबर व्यूरोलाई दिइएको छ ।
मौन अवधिमा सञ्चारमाध्यमहरुले पनि उम्मेदवार वा राजनीतिक दलको प्रचारप्रसार हुने गरी कुनै समाचार वा सूचना प्रकाशन प्रसारण गर्न नपाउने आयोगले जनाएको छ ।
