काठमाडाैं– नेकपा माओवादी केन्द्र निकट यातायात व्यवसायीको छाता संगठन नेपाल गणतान्त्रिक यातायात व्यवसायी संगठनको अध्यक्षमा गाेरखाका ज्ञानेन्द्र श्रेष्ठ निर्वाचित भएका छन् ।
काठमाडाैंमा सम्पन्न प्रथम राष्ट्रिय अधिवेशनले श्रेष्ठको अध्यक्षतामा ७५ सदस्यीय कार्यसमिति निर्विरोध निर्वाचित गरेको हो ।
संगठनको वरिष्ठ उपाध्यक्षमा किरणकुमार रिजाल, प्रथम उपाध्यक्षमा हुकुमसिंह नेपाली, द्वितीय उपाध्यक्षमा ऐनकुमार शाही, तृतीय उपाध्यक्षमा कान्छाराम थिङ र महासचिवमा सरोज खनाल निर्वाचित भएका छन् ।
त्यस्तै उपमहासचिवमा टेकप्रसाद बस्याल, गान्धीराज गिरी र रामहरि श्रेष्ठ, सचिवमा गुल्मीका रुपकलाल श्रेष्ठ, रुपन्देहीका रामचन्द्र भुसाल र चिनीबहादुर बोहोरा, कोषाध्यक्षमा पुरुषोत्तम सिंखडा र सहकोषाध्यक्षमा गोपबहादुर ठकुरी निर्वाचित भएका हुन् ।
अधिवेशनले संगठनका पूर्वअध्यक्ष डोलनाथ खनाललाई प्रमुख सल्लाहकारको भूमिका प्रदान गरेको छ ।
अधिवेशनले कोशी प्रदेशको संयोजकमा रामकुमार हिङमाङ, बागमती प्रदेशको संयोजकमा गुणराज घिमिरे, गण्डकी प्रदेशको संयोजकमा प्रकाशमणि तिवारी र लुम्बिनी प्रदेशको संयोजकमा बुटवलका जितेन्द्र खत्रीलाई जिम्मेवारी दिएको छ । बाँकी तीन प्रदेशको जिम्मेवारीसमेत चाँडो दिइने बताइएको छ ।
नवनिर्वाचित अध्यक्ष श्रेष्ठले राज्यले यातायात क्षेत्रलाई व्यवस्थित ढङ्गले सञ्चालन गर्न अधिकार सम्पन्न यातायात प्राधिकरण गठन गर्नुपर्ने बताए ।
२० वर्षे सवारीसाधन हटाउने सरकारको निर्णय प्राविधिक रुपले अव्यवहारिक भएको भन्दै उनले यसको निर्णय इञ्जिन परीक्षणको नतिजाका आधारमा हुनुपर्ने माग गरे ।
अधिवेशनमा मुलुकभरका २५० जना यातायात क्षेत्रका प्रतिनिधि तथा पर्यवेक्षकको उपस्थिति रहेको थियाे ।
