गाेरखा– चुमनुब्री गाउँपालिकाको मनास्लु क्षेत्रमा रहेको वीरेन्द्र तालमा हिमपहिराे खसेको छ । तालमा हिमपहिरो खस्दा तालको पानी छचल्किएर तल्लो क्षेत्रमा बाढी आएको छ ।
बाढीले साम्दु र सामागाउँ जोड्ने एउटा पुल बाढीले बगाएको जिल्ला प्रहरी कार्यालय गोरखाका प्रहरी प्रमुख बासुदेव पाठकले जानकारी दिए । उनका अनुसार स्थानीयले ताल फुटेको भनेर खबर गरेपछि सामागाउँ प्रहरी चौकीको टोली ताल रहेको क्षेत्रमा पुगेको थियो ।
साे टाेलीले ताल फुटेको नभई हिमपहिरोका कारण पानी बाहिर आएको जानकारी जिल्ला प्रहरी कार्यालयमा गराएको थियो । ‘बाढीले एउटा कच्ची पुल बगाएको छ । हाम्रो प्रहरी टाेलीका अनुसार बाढीले थप क्षति पुर्याउने सम्भावना छैन’, उनले भने ।
प्रमुख जिल्ला अधिकारी भोला दाहालले तालको पानी बाहिर आएको र क्षतिको विवरण प्राप्त हुन बाँकी रहेको बताए । बाढीले क्षति पुर्याउन सक्ने भन्दै धार्चे, आरुघाट लगायत क्षेत्रमा सतर्क रहन भनिएको उनले जानकारी दिए ।
चुमनुब्री गाँउपालिका उपाध्यक्ष लक्ष्मी गुरुङले प्रारम्भिक जानकारी अनुसार तालमा हिमपहिरो खसेको र त्यसपछि तालको पानी छचल्किएर बाहिर आएको खबर आफूहरुले पाएको बताइन् ।
‘ताल नै फुटेको नभई तालमा हिमपहिरो आएकाले पानी बाहिर पोखिएको र बाढी आएको भनेका छन्, बाँकी कुरा बुझ्दैछौं’, उनले भनिन्, ‘अहिले तल बुढिगण्डकीमा धमिलो पानी र बाढी आएको छ । अरु अवस्था के छ, बुझ्न खोजिरहेका छौं ।’
हिउँ रहेको सो हिमताल फुट्दा मनासलु वेश क्याम्पमा जाने पदमार्गमा समेत वाधा परको छ । हिमनदी संगै वाफ निस्केर सो ठाउँको जनजीवन समेत त्रासदी फैलिएको छ । गोरखा सदरमुकाम देखि ५२ कोष उत्तरमा पर्ने सो ताल उत्तरी गोरखाको अति प्रसिद्ध ताल हो ।
मनासलु पदमार्गमा गएका पर्यटकहरुको रोजाईको सो तालमा हिमपहिराे जाँदा पर्यटन व्यवसायलाई समेत असर पर्ने जानाकारहरु वताउँछन् । साे ताल २०७१ चैत २६ पनि फुटेकाे थियाे ।
साे ताल १२० मिटर लम्बाइ र १०० मिट, चाैढाइकाे रहेकाे छ । पालिका अध्यक्ष निमा लामाका अनुसार नदिकाे बवाह केही मात्रामा बढेपनि तल्ला क्षेत्रमा सर्तक रहन आग्रह गरेका छन् । नदिकाे बवाह बढेमा मनासलु क्षेत्रका तल्ला भाग, जगत, सल्लेरी, तथा धार्चे र आरूघाट गाउँपालिकाका खाेला किनारा क्षेत्र जाेखिममा पर्छन् ।