सप्तरी– राजविराज नगर क्षेत्रभित्र अवैध मदिरा उत्पादन तथा अव्यवस्थित खुलमखुल्ला बिक्री वितरणको कारण महिला तथा बालबालिका असुरक्षित भएको भन्दै एक सामाजिक संस्थाले त्यसविरुद्धमा आवाज उठाएको छ।
नगरक्षेत्रमा जताततै अनियन्त्रित रूपमा सञ्चालनमा रहेको अवैध मदिरा पसल तथा उत्पादन गर्ने भट्टीहरूलाई नियन्त्रण गर्न तराई-मधेश महिला फाउन्डेसनले नगरपालिकाको ध्यानाकर्षण गराएको हो।
फाउन्डेसनकी अध्यक्ष सुनिता साहको नेतृत्वमा गएको महिला टोलीले बुधवार राजविराजकी कार्यवाहक मेयर इसरत परविनलाई ध्यानाकर्षण पत्र बुझाएको थियो।
नगर क्षेत्रभित्रका अव्यवस्थित रूपमा मदिरा पसलहरू सञ्चालन गर्न इजाजत दिइएको अवस्था विद्यमान रहेको छ। मदिरा पसल सञ्चालन तथा समय सीमा निर्धारण नगरी मदिरा सेवन गर्ने केही व्यक्तिहरूले बाटो हिँड्ने महिला, दुर्व्यवहार गर्ने गरेको गुनासो बढ्दै गएको छ।
उक्त अवस्थाप्रति हाम्रो गम्भीर ध्यानाकर्षण भएको ध्यानाकर्षण पत्रमा उल्लेख छ। यसप्रकार खुलेआम जथाभाबी मदिरा पसल सञ्चालनको इजाजत, मदिरा सेवन गर्ने समय, बाटोघाटोमा मदिरा सेवन गरी गरिरहेको अभद्र व्यवहार र तनाव व्यवस्थापन गर्न गराउन नगरपालिकालाई ध्यानाकर्षण गराएको फाउन्डेसनकी अध्यक्ष क्रान्तिले बताएकी छन्।
यस्ता कियाकलापलाई समयमा नियन्त्रण गर्न गराउन अपिल गर्दै समस्या समाधानका लागि आवश्यक पहल नगरिए बाध्य भएर विरोधका कार्यक्रम अघि सार्ने अध्यक्ष क्रान्तिले चेतावनी दिइन्।
लामो समयदेखि फाउन्डेसन महिलाहरूको हकहितको लागि विभिन्न किसिमका कार्यक्रम गर्दै आएको छ।
