काठमाडौं– नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा पछिल्लो समय लगानीमैत्री वातावरण बन्दै गएको उल्लेख गर्दै बेलायती लगानीकर्तालाई नेपालमा लगानी गर्न आग्रह गरेका छन्।
युके–नेपाल बिजनेस फोरमले मंगलबार काठमाडौंमा आयोजना गरेको ‘अनप्याकिङ नेपालः मार्केट अपरच्युनिटीज फर युके बिजनेस’ सेसनमा विशेष वक्ता अध्यक्ष ढकालले महासंघको पहलमा सरकारले लगानी सहज बनाउन ३० भन्दा बढी कानुनी सुधार गरेको जानकारी दिँदै यी सुधारले उद्योग व्यवसायमैत्री वातावरण निर्माण भइरहेको बताए।
यस्तै द्विपक्षीय लगानी सम्झौता अर्को महत्त्वपूर्ण पक्ष भएको उल्लेख गर्दै उनले यस सम्झौताले नेपाल र बेलायतबीचको विश्वासलाई बलियो बनाउने, लगानीको राम्रो सुरक्षा प्रदान गर्दै र व्यापारको सम्बन्धलाई सहज बनाउने धारणा राखे।
नेपाल सम्भाव्यताले भरिपूर्ण देश भएको उल्लेख गर्दै उनले नेपालमा ऊर्जा, नवीकरणीय ऊर्जा, पर्यटन, कृषि उत्पादन, पूर्वाधार र स्वास्थ्य सेवा तथा सूचना प्रविधिलगायतका क्षेत्रमा लगानी गर्न बेलायती व्यवसायीहरूलाई आग्रह गरे।
‘महासंघको पहलमा धेरै नीतिगत सुधार भएका छन्। जसले नेपालमा लगानीमैत्री वातावरण सिर्जना गरेको छ। यो अवस्थामा निरन्तर आर्थिक सुधार र बलियो अन्तर्राष्ट्रिय साझेदार बेलायती व्यवसायीहरूलाई स्वागत गर्न तयार छौं। बेलायती विशेषज्ञता, प्रविधि र लगानीले नेपालको भविष्यलाई आकार दिन मद्दत गर्नेछ भने व्यवसायीलाई पनि दीर्घकालीन लाभ पनि दिनेछ’, उनले भने।
महासंघको पहलमा १० अर्ब रुपैयाँको पुँजी भएको कम्पनी स्थापना गरी स्थानीय लगानीकर्तासँग सहजीकरण गरेको जानकारी दिँदै अध्यक्ष ढकालले नेपालमा लगानी गर्न चाहने व्यवसायीहरूका लागि सहजीकरण गर्न महासंघ सधैं तयार रहेको समेत बताए।
