काठमाडौं– राष्ट्रिय स्वतन्त्र पार्टी (रास्वपा) सांसद डा. तोसिमा कार्कीले स्वास्थ्य बीमाको भुक्तानी गर्न सकिँदैन भन्ने स्वास्थ्यमन्त्री प्रदीप पौडेलको अभिव्यक्तिप्रति आपत्ति जनाएकी छन् ।
प्रतिनिधिसभाको शून्य समयमा बोल्दै सांसद कार्कीले जस लिने बेलामा स्वास्थ्य बीमा आफूहरूले ल्याएको हो भन्ने तर अहिले स्वास्थ्य बीमा कार्यक्रमलाई अलपत्र पार्न खोजेको आरोप लगाएकी छन् ।
‘जनसंख्या बीमाको रकम पाँच लखा पुर्याउँछु भन्ने महत्त्वकांक्षी सपना बाँड्नुहुने स्वास्थ्यमन्त्रीज्युबाट नै अब यो भुक्तानी गर्न सकिएन, बजेट पुगेन, स्वास्थ्य बीमा बन्द हुन लाग्यो भन्ने लाचार भएर दिनुभएको अभिव्यक्ति सुन्दा दुःख लागेको छ,’ उनले भनिन् ।
चल्ने बेलामा हामीले यस्तो कार्यक्रम ल्यायौं भनेर जस लिने तर समस्या पर्न थालेपछि अलपत्र छाडिदिने प्रवृति उचित नरहेको उनले बताइन् । ‘चल्ने बेलामा हामीले ल्यायौं भनेर जस लिन खोज्ने अनि यसलाई अलपत्र पारेर बषौंसम्म जम्मा २६ देखि २८ प्रतिशतसम्म पहुँच राखेर आजसम्म यो कार्यक्रमलाई धरासायी बनाएपछि हतोत्साहित हुने बानी राम्रो भएन,’ उनले भनिन् ।
सल्लाह र सुझाव दिन आफूहरू तयार रहेको उनले बताइन् । अगाडि भन्छिन्, ‘यदि सल्लाहार छैनन्, उयपुक्त सल्लाह लिन सकिँदैन, यसमा अध्ययन, तथ्याङ्कगत अध्ययन पुग्दैन भने मार्ग प्रशस्त गरिदिनुहोला हामी सल्लाह सुझाव दिन तयार छौं ।’
अनिवार्य स्वास्थय बीमा सबैका लागि सुरु गर्नुपर्ने उनको आग्रह छ । यसको सुरुआत मन्त्री, मन्त्रीको सचिवालय र परिवारबाट सुरुआत गर्नुपर्ने उनको आग्रह छ । यसो गरे स्वास्थ्य बीमा कार्यक्रम प्रभावकारी हुने उनको राय छ ।
